أنشر ...تؤجر!!

بسم الله الرحمن الرحيم

ملحوظه : شخص قرأ هذه المقاله...ولم ينشرها علي الفين وخمسميت واحد...مراته اتحرقت..

وولاده سافروا سنغافورا ...وحماته اصبحت بتطير بليل...وخالته برطمان المخلل بتاعها اتكسر ...!!!

---------------

شخص اسمه – محسن – من فلسطين....اقسم انه رأي الرسول في المنام.....ارسلها لعشره وهتسمع خبر سعيد كمان نص ساعه ...

--------------

الرسام الدينماركي ...وجد محروقا جمب مقر الصحافه الي هو بيتنيل فيه ......ارسلها لخمستاشر هتسمع خبر حلو كمان اربع سعات – اموت واعرف بيحسب الوقت ازاي -

--------------
___________________________

عندي سؤال واحد فقط.....لا غير....لماذا لا نحلل ونفكر ونربط الموضوع بالمنطق
قبل ما نعمل اي حاجة

يعني مثلا واحد اقسم انه رأي الرسول صلي الله عليه وسلم في المنام .....انا استفدت ايه ؟؟!؟!؟!
طب لما هنشرها لعشره.....هل في عداد فوق في السما كده....

-----

تخلف ازلي.......تخلف ازلي ازلي يعني....

انا مبتهمكش انت بالتخلف.....بس انت بردو بتحمل شيء من هذا التخلف...اعذرني

ماهو واحد بيقولك...لو منشرتهاش هيجيلك خبر وحش..وهتبقي تعيس طول حياتك

وواحد تاني..بيقولك.....واحد خبطته عربيه.......وانت بتصدق وبتنشر....وداخل وهات اميلات وابعت واديلو

ده يبقي ايه ؟!؟!؟
---------
بلاش دي..لسه شايف من يومين

واحده عندها 13 سنه كان عجز الاطباء عن شفائها...ونامت وصحيت لقت السيده زينب بتنزل ماء من عنيها...وصحيت لقت نفسها شفيت .....- سبحان الله - ....وبعدين ايه السيده زينب قالتلها في المنام....انها تكتب الي حصل وترسله تلتاشر مره ..

فواحد فقير وصلتله الحكايه وبعتها ..وبقي غني !!

وواحد كان صحته كويسه ..ومبعتاهاش....بقي تعبان وطلعان عين اهله !!

------

انهي عقل الي يصدق !؟!؟!؟!؟ ....

او تكون السعاده والحزن والرزق في الانسان........مربوط ...بابعتها لخمستاشر تكسب تلاجه

------------

بلاش .....الراجل الدينماركي........تصدق بالله لغايه دلوقتي هو عايش...واعتزل الكاريكاتير من كام شهر – هذه المقاله كتبت في 29 سبتمبر 2010 – وعايش وشغال وزي الفل

لا موجود محروق..ولا حصل فيه حاجه*

** مش عايز اخرج عن الموضوع.....بس هي دعوه للتفكير.....عارف الراجل ده متحرقش ليه ؟؟؟

لان لو كل واحد عمل خطأ وربنا حرقه ...كانت زمان الارض كلها والعه **

نقوم احنا مصدقين بردو....وابعت لعشره عشان تكسب غساله

------------

بالله عليك....اذا وجدت ..مثل هذه الرسائل...اربطها بالمنطق والعقل..

طيب هو مين الي هيعرف اني بعتها لعشره.بعد كده بقيت سعيد !!!

طيب مثلا...واحد رأي الرسول صلي الله عليه وسلم ......والله شيء طيب .وشيء جميل جدا ويا بخته.....بس انا استفدت ايه !؟؟! ...هو راجل صالح والرسول جاله في المنام .....انا عملت ايه بقي !؟!؟

فين السعاده لما ارسلها لعشره ! ؟

واشمعني نص ساعه !؟!؟
وبعدين بقي ايه .....الرسايل التحذيريه
متاكلش برتقال..عشان وحش بيجيب اسهال
متاكلش شيكولاته ..عشان وحشه بتجيب امساك
واحد رايح السينما فقعد علي كرسي كان فيه ابره فيها الايدز....متروحش السينما
واحده كانت بتاكل فشار..الانبوبه فرقعت في وشها – متعرفش ليه هيا غلاسه-
متشربش اي مشروب غازي عشان مليان غازات – شوفت انت دي –
متاكلش لا جبن ولا بيض ولا لحمه ولا سمك ولا نباتات - علق محاليل -

وكل ده ...ارسله لعشره ...والا حسابك هيبقي عند ربنا ..وحسبي الله ونعم الوكيل فيك ..ربنا يولع فيك ...
---------------
والناس بردو بتصدق ....
فين العقل ...فين المنطق...انا عمري ما شوفت واحد امريكي
داخل كاتب
Send this to 10 persons…..u will be happy JJ
الترجمه : بردو ارسل دي لعشره ...وهتبقي سعيد ومبسوط

او مثلا..شوفت واحد بيقول
واحد اقسم انه شاف المسيح في المنام..ارسلها لعشره...وهيجيلك خبر سعيد بعد حلقه اوبرا علي طول
--------
انا متأكد المره الجاي..لما تشوف رسايل زي دي هتفكر فيها قبل ما تنشرها

ملحوظه : لازم تنشر المقاله دي علي عشره.....والا هيقع عليك دولاب 8 درف قديم معتق ...مصنوع من خشب الزان..جواه سيد قشطه

انا فى بداية مقالك ومن العنوان اتفاجأت قلت ميندو ايه اللى خلاه ينشر حاجه زى دى

لكن لما كملت المقال عرفت انك لسه بعقلك معذرة حبيبى

اصلى كل ماافتح الايميل الاقى الحاجات دى ويقولى اما لخمستاشر زى ماحضرتك ذاكر فى كلامك

او لكل اللى عندك على الايميل حتى لو انا منهم

دائما يامندو عندك كل مايدور وكل جديد وكل ماهو مفيد

ودائما موفق فى اختيار كل مواضيعك

وللأمام دائما

شكرا علي مرورك ياعمدة

بجد شكرا ليك يا ميندو على انك اثرت الموضوع ده عشان بجد الحكاية دى انتشرت كتير جدا فى الفترة اللى فاتت والناس كانت مصدقاها بجد بطريقة مستفزة وكنت لما تيجى تكلم واحد على الحكاية دى وانه ميعملش كده يقولك ياعم اعمل اللى عليك وابتعد عن الشبهات وخليك فى الامان وابعتهم واعتقادات غريبة عند الناس ونفسى بجد كل واحد يفكر فى اى حاجة قبل ما يعملها ويشوف هو هيستفاد ايه منها او ممكن ضره فى ايه ونفكر كويس فى كل حياتنا هى جاية منين ورايحة على فين................ وشكرا